0%

小編年紀越大越冇記性,成日呢頭放低啲嘢,轉個頭就唔記得擺咗喺邊;Apple 早前喺發報會上推出 AirTag:只要將佢掛喺啲物品度,就可以隨時用 iPhone 追蹤返。對於冇記性嘅小編黎講又真係幾吸引~

點搵返唔見咗嘅 AirTag ?

AirTag 係用 BLE (低功耗藍牙),可以記錄低最後斷線嘅位置,或者 AirTag 入咗附近其他 Apple 產品嘅藍牙範圍,就會以點至點加密形式傳送返去 iCloud 伺服器;用「尋找」App 就可以搵返你個 AirTag,好似Find My iPhone咁佢可以發出聲響等你知道佢喺邊,確實係啱曬成搵唔到鎖匙嘅朋友們!同埋如果有好心人執到你個 AirTag,佢可以用支援 NFC 嘅手機去讀取你 AirTag 上嘅聯絡資料(唔洗擔心私隱外洩,喺要物主啟動咗遺失模式之後先可以讀取到)

咁佢又有咩缺點?

AirTag 就咁一粒,掛件喺需另外配嘅,掛件喺需另外配嘅,掛件喺需另外配嘅 (重要的事要講三遍!) 同埋佢CR2032 鈕扣電池大概要一年換一次電;而且「精確尋找」功能只兼容 有 U1 晶片嘅 iPhone 11、12 系列。最令人擔心嘅係 AirTag 會變咗 「捉姦神器」只要比另一半偷偷放入你個袋,你嘅蹤跡就無所遁形(雖然 iPhone 嘅「尋找」App有反追蹤功能,會用訊息話比你知你身邊有不明嘅 AirTag,但如果用 Android 機嘅...咪 gg !?)

不過總括黎講 AirTag 都係好方便啲大頭蝦同論盡豬仔,但大前提係要執到你件嘢嘅人路不拾遺,否則人地掉咗你粒AirTag你都係搵唔返。