【 捐血二三事 】

Posted by 小 雲 20/04/2018 0 Comment(s) 社會公益,

話說前幾日,小雲隔離位同事無啦啦失蹤左半日冇返工,咁話晒一場同事,點都要關心下嘛,嗱,絕對唔係八卦呀…… 問落之後,嘩嘩嘩!不得了。原來同事係請左 捐 血 假 !

 

而家先知道原來公司有捐血假!(拍手)小雲立即屈指一算,計下自己下次捐血日期,準備拎假!(笑)

 

 

係呢,如果大家公司都有捐血假,而你又從未捐過血的話,會唔會因此考慮去捐血呀?

 

捐血二三事

只要你 16 至 66 歲、體重 90 磅以上、健康良好就可以去捐血。捐血之前都要填寫一份表格,記錄有關健康、生活習慣、旅遊紀錄等問題。然後通過血色素測試、護士健康諮詢、量體温血壓,如果一切正常就可以正式捐血了。

 

捐過血之後,護士會同你講返你下次可以幾時再去捐血。跟據年齡性別唔同,可捐血頻率都會唔同咖:

16至17歲的青少年須相隔不少於150天才可捐一次,每年最多可捐三次
18歲或以上成年女士則須相隔不少於105天才可捐一次,每年最多可捐四次
18歲或以上成年男士須相隔不少於75天才可捐血一次,每年最多可捐五次

 

前往捐血前可以先上香港紅十字會網頁做「您是否適宜捐血評估」,初步了解自己適唔適合捐血。曾經捐過血嘅話,仲可以登入帳戶計算自己幾時可以再捐血,好方便咖!

 

睇實個血庫

香港紅十字會每日都會發佈血庫存量情況,可以在電台以聽成者自行上網查看。當血庫存量不足、遇上重大意外事故例如之前的嚴重巴士車禍,導致血液需求大增時,醫管局、紅十字會等機構都會呼籲市民捐血。捐血除左睇自己隔幾耐可以去捐之外,仲有以睇下血庫夠唔夠血先去捐!

 


^ 香港紅十字會網頁中會顯示每日血庫存量

 

點解要捐血

「捐血救人」!捐血絕對唔係為左咩虛榮或好處先去捐血!

 

不過咁,捐血的確對自己身體有好處。研究證實,經常捐血可以減少患心血管疾病風險,壽命亦相對長點。捐血時流失左血液,身體會重新製造出來,長遠黎講,新陳代謝率會變得更好,身體自然相對健康。

 

此外,捐血仲有另一個附加價值:免費體檢。

 

為確保受血者的安全,紅十字會將所有收集返來的血液都通過一系列化驗,包括:乙型肝炎抗原及核酸、丙型肝炎抗體及核酸、螺旋體抗體、愛滋病毒抗體及核酸和T淋巴細胞病毒抗體等化驗。每一袋濃縮血小板製品亦需先通過細菌培殖檢查。換個角度睇,捐血者可以借捐血機會知道自己有冇以上問題,可以講係一個小小的免費健康檢查。之不過,捐血檢查只係捐血的額外附加價值,唔好將呢樣當做唯一目的呀!

 

最後老土講句:保持血庫存量充足,有賴你我他!一齊去捐血呀!