📣📣📣凡購物滿 HK$ 1000 即享全單 8 折優惠!包括聖誕優惠套裝,折上折機會難逢,立即取得優惠碼歡渡佳節!🎅🎄🎉 Merry Christmas!🎄🎊🎁

【 拍攝美食技巧 】

Posted by 力奇迷 22/11/2018 0 Comment(s) 生活品味,

各位平時有冇影相呃 like 呀?相信各位都知道「有影相」同「呃到 like」係兩件事,所以,今日力奇迷就會同大家分享【 拍攝美食技巧 】,希望可以 po 多 d 靚相、攞多幾個 like 啦!

 

 

光線、色調
自然光
影相最靚就係用自然光,如果餐廳有得揀嘅,最好揀坐窗邊!當然仲要配合好嘅時間同天氣,天黑或者落雨嘅時候,窗邊就未必係一個好嘅光源了。

 

 

人造光源
未必每個地方都有自然光比到你,呢個時候就要注意餐廳嘅燈光適唔適合影靚相了。如果環境太暗,影出嚟嘅食物會黑媽媽,唔會靚。如果有朋友同行,可以請佢地用手機幫你打燈,咁幾暗都冇有怕啦!提提你,最靚嘅打燈角度係食物後方45度嘅位置!

 

 

色調
手機攝影有樣野好,就係 Filter 好方便!使用一個色彩溫暖鮮豔嘅 Filter,成張相即刻令人流晒口水!

 

 

角度
鳥瞰
最 easy 又最靚嘅拍攝食物角度,相信 IG 都見到大把,就係最頂正面影落去!但要注意配合光源,唔好影埋自己個影呀!

 

 

45度俯瞰
就同平時坐喺度睇你面前嘅食物咁嘅角度。配合景深效果,營造出真實臨場感。

 

 

水平
久水平角度適合多層次嘅食物,例如漢堡包,但要注意背景夠唔夠乾淨,避免太雜亂或者影到好多路人,如果避無可避可以利用景深將佢地蒙糊咗佢。

 

 

小撇步:有位著名攝影師講過:「如果你張相唔夠好,係因為你唔夠近。」試下將相機放近 d 食物呀,你會發現不一樣嘅效果!

 

 

構圖、道具
基本構圖方法可以參考之前嗰篇 【 唔好再亂咁影!教你攝影時構圖的重要性 】,但對於食物,仲有以下幾點可以補充:

 

 

善用餐具
配合餐具作構圖,亂擺又好,故意對稱擺都好,好好利用餐枱上嘅一切進行構圖,甚至可以營造出特別嘅風格效果!餐具都唔夠,試埋用你身上嘅物品:眼鏡、手錶、雜誌……試多 d 使用唔同道具,豐富你張相嘅內容。

 

 

人手入鏡
無論係自己的手或者請朋友出鏡,都可以營造出更特別、更貼近生活嘅感覺!而且又唔會太死板,有朋有肯比你影嘅話,就多作嘗試啦!同樣要注意背景唔好太亂呀!

 

 

切割
唔一定要影晒食物嘅全相,作出適當嘅切割,只拍攝食物嘅一部份,都可以影出與別不同嘅作品。記得配合黃金構圖指引喔!

 

 

呈現最美一面
食物被端上枱面,你可以試下轉下隻碟,搵出邊個角度你嘅食物係最靚嘅。例如切餅,你會選擇影左邊,定係右邊呢?咁簡單,邊邊靚咪影邊邊囉!

 

 

時機
倒汁畫面
如果有醬汁要倒,可以拍攝醬汁傾倒嘅嗰瞬間。雖然有 d 難,試下慢慢倒,快快影。

 

 

時間
食物會隨住時間而失去光澤,失去光澤就會影得唔靚,睇落唔新鮮,唔好食。所以要好好掌握影相嘅時間。而且,影得太耐食物都凍晒/溶晒,就唔好食咖啦!

 

 

Source: 網絡圖片

*文章謹代表作者個人意見,不代表本公司立場