【 市面上沒有能滿足需要的產品 於是自行開發製造 】

Posted by 康 吉 15/08/2018 0 Comment(s) 健康資訊,創新科技,

標題上面嗰句霸氣外漏嘅說話,就係 Platysens 創辦人及行政總裁黃昌銳嘅寫照。本身從事電子工程,亦係業餘運動好手,每年都參加渡海泳及三項鐵人項目。之不過,當佢做游泳訓練時就遇上唔少問題,搵極都搵唔到合適游泳訓練,特別係喺海上開放水域時用嘅產品。

 

佢指出,之前配戴運動手錶進行比賽或訓練嘅時候,成日都要停低睇下自己游到邊,游成點,好唔方便。而家市面上唔少運動科技產品都係手錶形態,平時係幾好用嘅,但當用家要游水嘅時候,因為雙手會不停划水,加上手錶浸左入水中都嚴重影響  GPS 接收,如果喺公海游水嘅時候,就會出現導航位置唔準確嘅情況。輕則影響泳手表現,重則唔知自己游左去邊!

 

由於係自己本身就係用家,所以 Platysens 團隊非常了解新產品需要甚麼。

 

Marlin 就係佢地設計製造,專為泳手而設的全球定位游泳監察儀。

 

 

上文提過,手錶式運動裝置會因為泳手划水及浸於水中嚴重影響 GPS 接收。於是 Marlin 就設計戴喺頭上。而且非常簡單易用,只須要落水前用手機 App 調較設定功能,游完之後同步返數據落 App 就可以。游水嘅時候可以單獨使用,充滿電後可以最少用到 5 小時,足夠訓練及比賽需要。

 

一邊游水,一邊接收語音提示,完全唔需要游游下停低睇錶睇數據。Marlin 可以話你知游泳嘅距離同速度,指引你方向準確導航。可能你會問,語音導航會唔會好難聽到清楚?你知啦,運動中嘅郁動咁大,而且游緊水時候會唔會聽唔到?唔會啦!Marlin 係使用骨傳導技術嚟傳遞語音提示,喺水入面都聽得清清楚楚!

 

 

Marlin 仲會係你嘅訓練好拍檔。泳手可以預先喺 App 內設定合適嘅訓練內容,然後游水嘅時候 Marlin 就會喺適當嘅時候提示你嘅訓練進度。

 

以藍牙連接手機,GPS 全球定位,設有泳池模式及開放水域模式,重量輕,適合游泳使用!

 

Source: Platysens

*文章謹代表作者個人意見,不代表本公司立場